Verbum

суфікса́цыя, -і, ж. (спец.).

Утварэнне слоў або форм слоў пры дапамозе суфіксаў.

суфле́, нескл., н.

Назва кулінарных вырабаў (кандытарскіх, малочных, мясных) у выглядзе пюрэ з узбітымі бялкамі.

С. з яблыкаў.

Ягаднае с.

суфлёр, -а, мн. -ы, -аў, м.

1. Работнік тэатра, які суфліруе акцёрам.

|| прым. суфлёрскі, -ая, -ае.

Суфлёрская будка (на сцэне).

2. Падказчык (разм.).

суфлі́раваць, -рую, -руеш, -руе; -руй; незак., каму.

Падказваць акцёрам словы ролі ў час спектакля.

суха...

Першая састаўная частка складаных слоў са знач.:

1) сухі (у 1 знач.), які мае адносіны да сухасці (у 1 знач.), напр.: сухавей, сухалюбівы, сухаядзенне;

2) з сухім (у 3 знач.), у сухім выглядзе, напр.: сухапрасаваны, сухасалёны, сухафрукты;

3) з сухім (у 4 знач.), напр.: сухабокі, сухаверхі, сухарукі, сухастой.

сухаве́й, -ю, мн. -і, -яў, м.

Сухі гарачы вецер, які нясе з сабой працяглую засуху.

|| прым. сухаве́йны, -ая, -ае.

сухагру́з, -а, мн. -ы, -аў, м.

1. Сухагрузнае судна.

2. Сухі груз.

Транспарціроўка сухагрузаў.

сухагру́зны, -ая, -ае (спец.).

Пра судны: прызначаны для перавозкі сухіх насыпных або штучных грузаў.

Сухагрузныя баржы.

сухадо́л, -а, м.

Бязводная лагчына, схіл, луг, якія атрымліваюць вільгаць толькі ад талай або дажджавой вады.

|| прым. сухадо́льны, -ая, -ае.

сухажы́лле, -я, мн. -і, -яў, н.

Шчыльная, эластычная мышачная звязка.

|| прым. сухажы́льны, -ая, -ае.