выскаля́ка, -і, ДМ -у, Т -ам, м.; ДМ -ля́цы, Т -ай (-аю), ж., мн. -і, -ля́к (разм.).
Той, хто любіць пасмяяцца, пажартаваць.
Выскалякі не давалі праходу.
вы́скачка, -і, ДМ -чцы, мн. -і, -чак, м. і ж. (разм.).
Чалавек, які, жадаючы выслужыцца, паказаць сябе, ва ўсё ўмешваецца, які заняў прыметнае грамадскае становішча не па заслугах.
вы́скачыць, -чу, -чыш, -чыць; зак.
1. Скочыўшы, пакінуць якое-н. месца.
В. з лодкі.
Выскачыла з галавы (перан.: забылася; разм.). В. замуж (перан.: паспешна або нечакана выйсці замуж; разм.).
2. Скачучы або таропка выбегшы, выехаўшы, з’явіцца адкуль-н.
Заяц выскачыў з кустоў.
В. насустрач.
3. (1 і 2 ас. не ўжыв.). Нечакана выпасці, выскачыць.
Нітка выскачыла з іголкі.
4. Недарэчна, не да месца сказаць, зрабіць што-н. (разм.).
В. са сваёй прапановай.
Выскачыў як Піліп з канапель (прымаўка).
|| незак. выска́кваць, -аю, -аеш, -ае.
вы́скварыць, -ру, -рыш, -рыць; -раны; зак., што.
Сквараннем вылучыць, здабыць.
В. тлушч з сала.
|| незак. высква́рваць, -аю, -аеш, -ае.
вы́скрабці, -бу, -беш, -бе; -бі; -бены; зак., што.
Скрабучы, ачысціць або выдаліць.
В. патэльню.
В. рэшткі кашы з каструлі.
|| незак. выскраба́ць, -а́ю, -а́еш, -а́е і выскрэ́бваць, -аю, -аеш, -ае.
вы́скубці, -бу, -беш, -бе; вы́скуб, -бла; -бі; -бены; зак., што.
Скубучы, выцягнуць адкуль-н. або зрабіць паглыбленне, выемку ў чым-н.
В. жменю воўны.
В. ў стозе нару.
|| незак. выскуба́ць, -а́ю, -а́еш, -а́е і выску́бваць, -аю, -аеш, -ае.
|| аднакр. вы́скубнуць, -ну, -неш, -не; -ні.
вы́слабаніць, -ню, -ніш, -ніць; -нены; зак., каго-што (разм.).
Выняць, вызваліць з чаго-н. цеснага.
В. нагу са стрэмені.
|| незак. выслабаня́ць, -я́ю, -я́еш, -я́е.
вы́слаць¹, вы́шлю, вы́шлеш, вы́шле; вы́шлі; вы́сланы; зак., каго-што.
1. Паслаць адкуль-н.
В. ліст.
В. каго-н. насустрач госцю.
2. У пакаранне выдаліць за межы чаго-н.
В. са сталіцы.
|| незак. высыла́ць, -а́ю, -а́еш, -а́е.
|| наз. высыла́нне, -я, н. і вы́сылка, -і, ДМ -лцы, ж. (да 2 знач.).
|| прым. вы́сылачны, -ая, -ае і высыльны́, -а́я, -о́е (да 2 знач.; разм.).
вы́слаць², -сцелю, -сцелеш, -сцеле; вы́сцелі; -сланы; зак., што.
Пакрыць усюды, услаць.
В. скрынку паперай.
|| незак. высціла́ць, -а́ю, -а́еш, -а́е.