Verbum

пралі́ў Вузкая паласа вады паміж востравам на возеры і берагам; водны перашыек (БРС).

прало́з Свабоднае, гальнае месца паміж кустамі лазы на вадзе; пратока (Стол.). Тое ж гальві́нка (Стол.).

праме́нак Прамежак, праход паміж хлявамі, хатамі (Жытк.).

праміжу́т Пэўны адрэзак адлегласці, поля; вузкая палоска паміж больш шырокімі (Ветк.).

прамі́к Прамое рэчышча ракі; прамая кароткая пуціна, сцежка (Рэч., Слаўг.). Тое ж прамі́зна (Нас.).

прамы́віна

1. Размытае вадой месца ў дамбе, гаці (БРС). Тое ж прамы́іна (Слаўг.), прамоіна (Нясв. Слаўг., Шчуч.).

2. Незамярзаючае, прамытае месца на быстрыні ракі (БРС). Тое ж прамы́іна (Слаўг., Смален. Дабр.), прамоіна (Нясв., Слаўг., Шчуч.).

прапо́й Магутны вір, які ўтвараецца пры ўпадзенні р. Проні ў Сож («Советская Белоруссия», 13 июня 1945 г.).

прары́ў Месца на плава́х, дзе можна праваліцца (Палессе Талст.).

прарэ́з Каляіна, выціснутая коламі на палявой дарозе (Слаўг.). Тое ж поразь, проразь (Слаўг.).

прасве́т

1. Гальнае, асветленае месца ў лесе; край лесу, дзе відаць поле (Слаўг.).

2. Прагаліна паміж узгоркамі (Слаўг.). Тое ж просвет, просвець (Слаўг.).