Verbum

паў...,

Першая састаўная частка складаных слоў, якая азначае: 1) палавіна чаго‑н., напрыклад: паўвека, паўгадзіны, паўметра; 2) напалавіну, папалам з чым‑н., напрыклад: паўшарсцяны, паўшаўковы; 3) не зусім, амаль, напрыклад: паўкачавы, паўдзікі, паўмёртвы.

паўабаро́на, ‑ы, ж.

Спец. Частка каманды, якая адначасова дапамагае абароне і нападзенню ў гульні ў футбол, хакей і пад.

паўабаро́нца, ‑ы, м.

Спец. Ігрок паўабароны.

паўабаро́т, ‑а, М ‑роце, м.

Няпоўны абарот. Паўабарот кола.

паўабаро́та, м.

Паварот напалавіну. — Люда, — паклікаў урач, зрабіўшы паўабарота на парозе, — цябе ў штаб выклікаюць. Асіпенка.

паўава́л, ‑а, м.

Няпоўны авал.

паўава́льны, ‑ая, ‑ае.

Які мае форму паўавала. Паўавальнае акно.

паўаго́лены, ‑ая, ‑ае.

Амаль аголены. Паўаголеныя дрэвы.

паўадзе́ты, ‑ая, ‑ае.

Не зусім, не поўнасцю адзеты.

паўадкры́ты, ‑ая, ‑ае.

Не зусім адкрыты, прыадкрыты. Абхапіўшы рукамі маладую сасоначку, .. [Ніна] стаяла з паўадкрытымі вуснамі і ўважліва глядзела на мяне, нібы чагосьці чакала... Шашкоў.