падсе́чка, ‑і, ДМ ‑чцы, ж.
1. Дзеянне паводле дзеясл. падсячы, падсекчы (у 1, 2 і 4 знач.).
2. Спец. Насечанае месца на сасне для збору смалы.
падсе́яны, ‑ая, ‑ае.
Дзеепрым. зал. пр. ад падсеяць.
падсе́яць, ‑сею, ‑сееш, ‑сее; зак., што і чаго.
1. Пасеяць дадаткова. Падсеяць жыта. Падсеяць гароху.
2. Пасеяць (траву і пад.) паміж усходамі збожжавых. Падсеяць канюшыну па пшаніцы.
падсілкава́нне, ‑я, н.
Разм.
1. Дзеянне паводле знач. дзеясл. падсілкаваць.
2. Тое, што падсілкоўвае, дае сілу, бадзёрасць; падмацаванне. У пакоі мы забавіліся нядоўга: паклалі пад падушкі партфелі. З дарогі памыліся і заспяшаліся шукаць падсілкавання. Сабаленка.
падсілкава́ны, ‑ая, ‑ае.
Дзеепрым. зал. пр. ад падсілкаваць.
падсілкава́цца, ‑куюся, ‑куешся, ‑куецца; зак.
Разм. Паеўшы, падмацаваць свае сілы. Падсілкаваўшыся яблыкамі,.. [Пятро] рушыў далей і яшчэ да цямна мінуў балота, густы сасновы лес і прыйшоў у.. вёску. Шамякін. У хаце Васіль скінуў цяжкія гумавыя боты, распрануў ватоўку, падсілкаваўся халодным малаком і лёг на канапу. Гаўрылкін.
падсілкава́ць, ‑кую, ‑куеш, ‑куе; зак., каго.
Разм. Пакарміўшы, падмацаваць чые‑н. сілы.
падсілко́ўванне, ‑я, н.
Разм. Дзеянне паводле знач. дзеясл. падсілкоўваць — падсілкаваць.
падсілко́ўвацца, ‑аюся, ‑аешся, ‑аецца; незак.
1. Незак. да падсілкавацца.
2. Зал. да падсілкоўваць.
падсілко́ўваць, ‑аю, ‑аеш, ‑ае.
Незак. да падсілкаваць.