Verbum

джыха́д

(ар. džihad = літар. намаганне)

тое, што і газават.

джэйра́н

(цюрк. džejran)

парнакапытная жывёла роду газелей, пашыраная ў пустыннай і паўпустыннай мясцовасцях Азіі.

джэм

(англ. jam)

густое варэнне з фруктаў або ягад у выглядзе жэлепадобнай масы.

джэ́мпер

(англ. jumper)

вязаная кофта без каўняра, якая надзяваецца праз галаву.

джэмсаніе́ла

(н.-лац. jamesoniella)

пячоначны мох сям. германіевых, які трапляецца ў зацененых месцах на драўніне, якая гніе, глебе, камянях, каранях дрэў.

джэнтльме́н

(англ. gentleman = літар. высакародны чалавек)

1) чалавек, які строга прытрымліваецца свецкіх правіл паводзін (у Вялікабрытаніі і іншых англамоўных краінах);

2) чалавек, які вызначаецца сваёй выхаванасцю ў паводзінах, далікатнасцю і зграбнасцю адзення.

джэ́нтры

(англ. gentry)

1) дробнапамеснае дваранства ў Англіі ў 16—17 ст., якое перабудавала сваю гаспадарку на капіталістычны лад;

2) пашыранае ў еўрапейскай навуковай літаратуры абазначэнне кітайскага феадальнага саслоўя шэньшы.

джэ́рсі́

(англ. jersey, ад Jersey = назва вострава ў праліве Ла-Манш)

шарсцяная або шаўковая трыкатажная тканіна, а таксама адзенне з такой тканіны.

джэрыме́ндэрынг

[англ. gerrymandering, ад E. Gerry = прозвішча амер. губернатара + (sala)mander = саламандра]

метад утварэння выбарчых акруг, калі ў акругі ўваходзіць розная колькасць выбаршчыкаў, чым парушаецца прынцып роўнага прадстаўніцтва.

джэспілі́ты

(ад англ. jasper = яшма + -літ)

жалезістыя кварцыты, якія складаюцца з магнетыта-гематытавых і кварцавых праслоек.