малы́ш, ‑а, м.
Разм. Маленькі хлопчык, дзіця. Да паласатага шлагбаума спускалася чародка малышоў у белых панамках. Даніленка. І ўпершыню ў сваіх калысках Заснулі ціха малышы. Астрэйка.
малы́шка, ‑і, ДМ ‑шцы; Р мн. ‑шак; ж.
Разм. Жан. да малыш.
мальба́, ‑ы, ж.
Вельмі моцная просьба. Васілёк ведаў, што з дзедам заўсёды цікава хадзіць, таму з мальбой у голасе папрасіў: — Дзядуля, вазьміце і мяне з сабой! Рылько.
мальбе́рт, ‑а, М ‑рце, м.
Падстаўка, на якую кладзецца падрамнік з палатном або папера для работы мастака над карцінай. Мастак выбраў зручнае месца каля пуні, устанавіў свой мальберт, разлажыў на мокрай траве раскрыты эцюднік з фарбамі і пэндзлямі. В. Вольскі.
[Ад ням. Malbrett.]
ма́льва, ‑ы, ж.
Высокая дэкаратыўная расліна сямейства мальвавых з вялікімі яркімі кветкамі. Цягнуцца аж пад самае застрэшша цыбатыя мальвы. Вітка. Чырвоныя мальвы выглядалі з .. гародчыкаў перад хатамі. Брыль.
[Лац. malva.]
ма́львавы, ‑ая, ‑ае.
1. Які мае адносіны да мальвы. Мальвавыя кветкі.
2. у знач. наз. ма́львавыя, ‑ых. Сямейства раздзельна-пялёсткавых травяністых і дравяністых раслін (мальва, канатнік, кенаф, бавоўна і інш.).
мальва́зія, ‑і, ж.
Сорт ранняга вінаграду. // Салодкае віно з гэтага гатунку вінаграду.
[Іт. malvasia ад назвы горада Мальвазіі ў Грэцыі.]
малько́вы, ‑ая, ‑ае.
Які мае адносіны да малька, малькоў. Мальковыя сажалкі.
мальто́за, ‑ы, ж.
Спец. Цукрыстае рэчыва, якое атрымліваецца пры ўздзеянні соладу на крухмал; соладавы цукар.
[Англ. maltose ад malt — солад.]
мальтузія́нец, ‑нца, м.
Паслядоўнік мальтузіянства.