Verbum

ю́гендстыль

(ням. Jugendstil)

нямецкая назва стылю «мадэрн».

ю́гер

(лац. iugerum)

зямельная мера паверхні ў Стараж. Рыме, роўная 2942 м​².

юдаі́зм

(п.-лац. iudaismus, ад лац. iudaicus = яўрэйскі)

1) монатэістычная рэлігія, распаўсюджаная пераважна сярод яўрэяў; іудаізм;

2) моўны зварот, выраз, які ўласцівы яўрэйскай мове.

юдафі́л

(ад лац. iudaeus = яўрэй + -філ)

прыхільнік усяго яўрэйскага.

юдафо́б

(ад лац. iudaeus = яўрэй + -фоб)

ненавіснік яўрэяў; антысеміт.

юз

[англ. D. Hughes = прозвішча амер. вынаходцы (1831—1900)]

літарадрукавальны тэлеграфічны апарат.

ю́ка

(ісп. iuca, з індз.)

вечназялёная дрэўная расліна сям. лілейных, якая пашырана ў Цэнтр. і Паўд. Амерыцы, а таксама валокны гэтай расліны, з якіх вырабляюць канаты, рагожы і інш.

юлія́нскі

(лац. iulianus, ад Julius Caesar = Юлій Цэзар)

звязаны з сістэмай летазлічэння, якую ўвёў рымскі імператар Юлій Цэзар (гл. каляндар 2).

юмі́зм

[ад англ. D. Hume = прозвішча англ. філосафа (1711—1776)]

суб’ектыўна-ідэалістычнае вучэнне аб пачуццёвым вопыце, прынцыпах агнастыцызму, створанае Д. Юмам і яго паслядоўнікамі.

ю́нга

(ням. Junge = юнак)

падлетак на судне, які рыхтуецца стаць матросам.