перакава́ць, -кую́, -куе́ш, -куе́; -куём, -куяце́, -кую́ць; -ку́й; -кава́ны; зак.
1. каго-што. Падкаваць нанава або ўсіх, многіх.
П. каню пярэднія ногі.
П. усіх коней.
2. што. Перарабіць каваннем.
П. мячы на аралы (высок.).
3. перан., каго-што. Карэнным чынам змяніць, перавыхаваць (разм.).
П. свой характар.
|| незак. перако́ўваць, -аю, -аеш, -ае.
|| звар. перакава́цца, -кую́ся, -куе́шся, -куе́цца; -куёмся, -куяце́ся, -кую́цца; -ку́йся (да 3 знач.); незак. перако́ўвацца, -аюся, -аешся, -аецца (да 3 знач.).
Па ходзе п’есы галоўны герой перакоўваецца.
|| наз. перако́ўванне, -я, н. і перако́ўка, -і, ДМ -ўцы, ж.
перака́з, -у, м.
1. гл. пераказаць.
2. мн. -ы, -аў. Пісьмовая або вусная перадача сваімі словамі чаго-н. прачытанага, пачутага.
Зрабіць п. аповесці.
пераказа́ць, -кажу́, -ка́жаш, -ка́жа; -каза́ў, -за́ла; -кажы́; -ка́заны; зак., што.
1. Расказаць, выкласці сваімі словамі што-н.
П. змест паэмы.
2. і з дадан. сказам. Паведаміць пра што-н. вусна; перадаць на словах чыю-н. просьбу, даручэнне і пад.
П. дома ўбачанае ў горадзе.
Перакажыце маім, што прыеду ў выхадны.
3. Расказаць падрабязна, паслядоўна пра ўсё, многае.
П. усе навіны.
|| незак. перака́зваць, -аю, -аеш, -ае.
|| наз. перака́з, -у, м.
перакале́ць, -е́ю, -е́еш, -е́е; зак. (разм.).
Перамерзнуць, моцна змерзнуць.
Перакалеў, едучы дамоў.
перакале́чыць, -чу, -чыш, -чыць; -чаны; зак., каго-што (разм.).
Пакалечыць усіх, многіх або ўсё, многае.
Вайна перакалечыла людзей.
перакало́ць¹, -калю́, -ко́леш, -ко́ле; -калі; -ко́латы; зак., што.
Раскалоць усё, многае.
П. усе дровы.
|| незак. перако́лваць, -аю, -аеш, -ае.
перакало́ць², -калю́, -ко́леш, -ко́ле; -калі; -ко́латы; зак.
1. што. Прыкалоць іначай або ў іншым месцы.
П. значок.
2. каго. Закалоць усіх, многіх.
П. свіней.
|| незак. перако́лваць, -аю, -аеш, -ае (да 1 знач.).
перакана́льны, -ая, -ае (разм.).
Тое, што і пераканаўчы.
|| наз. перакана́льнасць, -і, ж.
перакана́насць, -і, ж.
Цвёрдая ўпэўненасць у чым-н.
Сцвярджаць што-н. з вялікай перакананасцю.
перакана́нне, -я, н.
1. гл. пераканаць.
2. мн. -і, -яў. Цвёрды, непахісны погляд на што-н., упэўненасць.
Адстойваць свае перакананні.