Verbum

рыбавяндля́рны, ‑ая, ‑ае.

Прызначаны для вэнджання рыбы. Рыбавяндлярны завод.

рыбавяндля́рня, ‑і, ж.

Прадпрыемства, памяшканне для вэнджання рыбы.

рыбагадава́льнік, ‑а, м.

Сажалкавая гаспадарка, якая займаецца вырошчваннем малявак (карпа, белага амура і інш. рыб) для рыбаводных гаспадарак, якія дагадоўваюць рыбу да таварных памераў.

рыбагандлёвы, ‑ая, ‑ае.

Які мае адносіны да гандлю рыбай.

рыбагаспада́рчы, ‑ая, ‑ае.

Які звязаны з рыбнай гаспадаркай, прызначаны для яе. Рыбагаспадарчая ўстанова.

рыбае́дны, ‑ая, ‑ае.

Які корміцца рыбай, ужывае ў ежу рыбу. Рыбаедныя птушкі.

рыбазаво́д, ‑а, М ‑дзе, м.

Завод па апрацоўцы рыбы (кансерваванню, засолу і пад.). З дзіцячых год марыў Сцяпан Казачок аб моры, але ўбачыў яго ўпершыню на дваццаць восьмым годзе жыцця, прыехаўшы на рыбазавод. Дуброўскі.

рыба́к, ‑а, м.

Чалавек, які займаецца лоўляй рыбы. Рыбак сядзіць задумна пры агні, І ў водблісках вады спакойны твар Ахоплены павевам цеплыні. Броўка. Мне засталося толькі з’ездзіць на Старыцу і пабачыцца з маім даўнім і добрым прыяцелем, Піліпам Андрэевічам Бондарам, патомным прыпяцкім рыбаком, брыгадзірам рыбалавецкай брыгады з суседняга прырэчнага калгаса. Краўчанка.

рыбакалга́с, ‑а, м.

Рыбалавецкая калектыўная гаспадарка, якая займаецца здабываннем рыбы.

рыбакамбіна́т, ‑а, М ‑наце, м.

Камбінат па апрацоўцы рыбы.