муміфікава́цца, ‑куецца; зак. і незак.
Спец.
1. Ператварыцца (ператварацца) у мумію 1 (у 1 знач.).
2. толькі незак. Зал. да муміфікаваць.
муміфікава́ць, ‑кую, ‑куеш, ‑куе; зак. і незак., каго-што.
Спец. Ператварыць (ператвараць) у мумію 1 (у 1 знач.); бальзамаваць.
муміфіка́цыя, ‑і, ж.
Спец. Дзеянне паводле знач. дзеясл. муміфікаваць.
[Фр. momification.]
му́мія 1, ‑і, ж.
1. Труп, захаваны ад гніення бальзамаваннем.
2. перан. Пра худога, маларухомага або не здатнага да моцных пачуццяў чалавека. Пасярэдзіне, за сталом, крэсла-трон. Прысланіўшыся да яго непамерна высокай спінкі, сядзіць у чорным сурдуце мумія. Ніводзін мускул не жыве — усё застыла. Сяргейчык. [Ярохін:] — Чалавек павінен быць вясёлым, жыццярадасным, і няма ніякай патрэбы ператварацца яму ў нейкую бязмоўную мумію. Шамякін.
[Араб. mumija, ад перс. mum — воск.]
му́мія 2, ‑і, ж.
Мінеральная фарба розных колераў (ад светла-чырвонага да чырванавата-карычневага).
[Араб. mumija.]
мундзі́р, ‑а, м.
Ваеннае або цывільнае форменнае адзенне. Быў выхадны дзень, салдатам далі звальненне. Ішлі вясёлыя, у парадных мундзірах. Хомчанка. Памешчыкі лёгка мянялі свае фракі і сурдуты на чыноўніцкія мундзіры. «Полымя».
•••
Бульба ў мундзірах гл. бульба.
[Ням. Montur, ад фр. monture — забеспячэнне.]
мундзі́рны, ‑ая, ‑ае.
Які мае адносіны да мундзіра. Мундзірнае сукно. □ Твар .. [танкіста] быў як набрынялы, і кадык выпіраў з расшпіленага мундзірнага каўняра. Чорны.
мундзі́рчык, ‑а, м.
Памянш.-ласк. да мундзір.
муніцыпалізава́ны, ‑ая, ‑ае.
1. Дзеепрым. зал. пр. ад муніцыпалізаваць.
2. у знач. прым. Перададзены ва ўласнасць гарадскім або сельскім органам улады. Муніцыпалізаваныя землі.
муніцыпалізава́цца, ‑зуецца; незак.
Зал. да муніцыпалізаваць.
муніцыпалізава́ць, ‑зую, ‑зуеш, ‑зуе; зак. і незак., што.
Правесці (праводзіць) муніцыпалізацыю чаго‑н. Муніцыпалізаваць ўласнасць.