тары́ф
(фр. tarif, ад ар. ta’rif = вызначэнне)
норма збораў, аплаты за што-н., напр. за перавоз пасажыраў, грузаў, паштовыя паслугі, карыстанне электраэнергіяй, газам і інш. (напр. чыгуначны т., таможны т.).
тарыфіка́цыя
(фр. tarification, ад tarif < ар. ta’rif = вызначэнне)
вызначэнне тарыфу на аснове якой-н. класіфікацыі аб’ектаў абкладання або аплаты (напр. т. заработнай платы).
таталіза́тар
(фр. totalisateur, ад totaliser = падсумоўваць)
1) механічны лічыльнік на скачках, які паказвае суму грашовых ставак на таго ці іншага каня, а таксама бюро, якое прымае такія стаўкі і аддае выйгрыш;
2) гульня на грошы на скачках.
таталіта́рны
(фр. totalitaire, ад лац. totus = увесь, цэлы)
заснаваны на поўным панаванні дзяржавы над усімі бакамі жыцця грамадства, гвалце, знішчэнні дэмакратычных свабод і правоў асобы (напр. т. рэжым).
таталітары́зм
(фр. totalitarisme, ад лац. totus = увесь, цэлы)
таталітарны палітычны, дзяржаўны рэжым.
тата́льны
(фр. total, ад лац. totus = увесь, цэлы)
усёабдымны, усеагульны (напр. т-ая мабілізацыя).
татуа́ж
(фр. tatouage, ад tatouer = татуіраваць)
нанясенне татуіроўкі на цела (распаўсюджана ў якасці моднага захаплення ў маладзёжным і артыстычным асяроддзі).
таўтало́гія
(п.-лац. tautologia, ад гр. tauto = тое самае + logos = слова)
паўтарэнне таго ж самага іншымі словамі.
ток-шо́у
(англ. talk show, ад talk = размова + show = відовішча, паказ)
тэлевізійнае інтэрв’ю з якой-н. вядомай асобай (палітыкам, грамадскім дзеячам, акцёрам і г. д.), з групай такіх асоб.
то́лінг
(англ. tolling)
кам. асобы таможны рэжым, які ажыццяўляецца пра ўвозе ў краіну замежнай фірмай прамысловай сыравіны, што апрацоўваецца пры фінансавай падтрымцы гэтай фірмы, а атрыманы прадукт вывозіцца назад, пры гэтым увоз і вываз абкладаецца меншай пошлінай, чым пры звычайным імпарце і экспарце тавару.