Verbum

паўсутарэ́нне, ‑я, н.

Уст. Тое, што і паўпадвал.

паўсу́тачны, ‑ая, ‑ае.

Які працягваецца паўсутак. // Разлічаны на паўсутак.

паўсухі́, ‑ая, ‑ое.

Амаль сухі, не зусім сухі. Месцамі пракідалася канюшына з ружаватымі паўсухімі пампонамі кветак. Асіпенка.

паўсфе́ра, ‑ы, ж.

Палавіна сферы, шара. Нябесная паўсфера.

паўсферы́чны, ‑ая, ‑ае.

Які мае адносіны да паўсферы, уяўляе сабой паўсферу. Паўсферычная форма.

паўсхва́твацца, ‑аецца; ‑аемся, ‑аецеся, ‑аюцца; зак.

Усхваціцца — пра ўсіх, многіх або пра ўсё, многае. Адразу ўсе паўсхватваліся, толькі высокі афіцэр застаўся сядзець. С. Александровіч.

паўсхо́дзіць, ‑дзіць; ‑дзім, ‑дзіце, ‑дзяць; зак.

Тое, што і паўзыходзіць. Была пара з вальнейшым часам. Сяўба скончылася. Ярына паўсходзіла даўно і добра. Ішлі дажджы. І гэта вельмі гадзіла на поле. Чорны.

паўсхо́плівацца, ‑аецца; ‑аемся, ‑аецеся, ‑аюцца; зак.

Усхапіцца — пра ўсіх, многіх або пра ўсё, многае. На руках паўсхопліваліся пухіры. □ Да таго, як .. [падпалкоўнік] прывітаўся з танкістамі, усе, хто сядзеў, паўсхопліваліся. Мележ.

паўсціла́ць, ‑аю, ‑аеш, ‑ае; зак., што.

Услаць усё, многае. Паўсцілаць падлогу дыванамі.

паўсця́гваць, ‑аю, ‑аеш, ‑ае; зак., каго-што.

Усцягнуць усё, многае або ўсіх, многіх. Паўсцягваць мяхі на воз. Паўсцягваць боты на ногі.