панава́рваць, ‑аю, ‑аеш, ‑ае; зак., чаго.
Наварыць многа чаго‑н. Панаварваць страў.
панаваро́чваць, ‑аю, ‑аеш, ‑ае; зак., чаго.
Наварочаць, наваліць, накідаць, нагрувасціць у вялікай колькасці. Панаварочваць зямлі.
панава́ты, ‑ая, ‑ае.
Разм. Які мае панскія замашкі. [Маці:] — Ты не шукай .. панаватае, бо яна табе жыць спакойна не дасць. Шукай сябе дзяўчыну простую, добрую, працавітую. Чорны.
панава́ць, ‑ную, ‑нуеш, ‑нуе; незак.
1. Мець уладу над кім‑, чым‑н., уладарыць. Дні тры ў мястэчку панавалі белапалякі. Лынькоў. З гісторыі .. [Сярожка] цьмяна ўспамінаў, што некалькі вякоў там [у Мексіцы] панавалі іспанцы. Скрыпка.
2. Мець пераважнае распаўсюджанне; пераважаць. Зялёны колер розных адцен[ня]ў пануе тут над усім. В. Вольскі. Баявы настрой, які панаваў у пачатку сходу, хутка апаў, загаварылі пра дробязі, і то без запалу, абы не маўчаць. Хадкевіч. // Ахопліваць, запаўняць, напаўняць сабой усё. У лясным гушчары пануе спрадвечны змрок і цішыня. М. Ткачоў. Хлопцы маўчаць. Стоеная цішыня пануе некалькі хвілін. Навуменка.
3. Узвышацца над чым‑н. (пра горы, будынкі і пад.). Мы падымаемся на ўзвышша Бірса, якое пануе над усім наваколлем. В. Вольскі. [Дуб] уладна панаваў над шырокім прасцягам прысадзістага алешніку. Аляхновіч.
4. Быць галоўным у чым‑н., дзе‑н.; першынстваваць. То браў верх тоўсты.. голас, то панаваў галасок тоненькі. Бядуля.
5. Разм. Жыць у раскошы. У харомах прыгожых панавала сястра: клеці поўныя збожжа, а каморы — дабра. Машара.
панаве́ць, ‑ее; зак.
Зрабіцца навейшым, абнавіцца. На касынцы сапраўды было многа пылу, аж белы струменьчык мільгануў паўз вуха, як [дзяўчына] страпянула. Касынка адразу нібы панавела. Кулакоўскі.
панаве́шваны, ‑ая, ‑ае.
Дзеепрым. зал. пр. ад панавешваць.
панаве́шваць, ‑аю, ‑аеш, ‑ае; зак., чаго.
Навешаць чаго‑н. у многіх месцах. Панавешваць бялізны. Панавешваць ліхтароў.
панавіва́ны, ‑ая, ‑ае.
Дзеепрым. зал. пр. ад панавіваць.
панавіва́ць, ‑аю, ‑аеш, ‑ае; зак., чаго.
Навіць вялікую колькасць чаго‑н. Панавіваць вяровак.
панавіса́ць, ‑ае; зак.
Навіснуць — пра ўсё, многае. Панавісалі галіны да самага долу.