паадцвіта́ць, ‑ае; зак.
Адцвісці — пра ўсё, многае. Ліпы паадцвіталі ўжо, але пахучасці свае дасюль не страцілі. Мурашка. Як хутка змянілася ўсё тут! .. Нават паадцвіталі ружы. Савіцкі.
паадціна́ць, ‑аю, ‑аеш, ‑ае; зак., што.
Адцяць усё, многае.
паадціра́ць, ‑аю, ‑аеш, ‑ае; зак., што.
Адцерці ўсё, многае. Паадціраць плямы. // Вярнуць адчувальнасць трэннем. Паўзіраўшыся, міжволі пацягнуўся рукою да вушэй — пасля таго, як ён [Алесь] іх ледзь паадціраў снегам, вушы раз за разам зацягваліся свежымі струпамі і не пераставалі свярбець. Летка.
паадціска́ць, ‑аю, ‑аеш, ‑ае; зак., каго-што.
Адціснуць усё, многае або ўсіх, многіх. Паадціскаць пальцы на нагах. Паадціскаць людзей да сцяны.
паадця́гваць, ‑аю, ‑аеш, ‑ае; зак., каго-што.
Адцягнуць куды‑н. усё, многае або ўсіх, многіх. Паадцягваць бярвенне.
паадчыня́цца, ‑яецца; зак.
Адчыніцца — пра ўсё, многае. Вокны паадчыняліся. Магазіны паадчыняліся. □ Эшалон спыніўся.. У цялятніках паадчыняліся дзверы. Чорны.
паадчыня́ць, ‑яю, ‑яеш, ‑яе; зак., што.
Адчыніць усё, многае; адчыніць што‑н. у многіх месцах. Пасажыры паадчынялі вокны, абмахваліся хустачкамі. Мяжэвіч. Я сеў за свой стол, паадчыняў шуфляды паглядзець, што там ёсць. Сабаленка. Сымон прыехаў у Старочын рана. Гандляры толькі паадчынялі свае крамы. Чарнышэвіч.
паадчышча́цца, ‑аецца; зак.
Адчысціцца — пра ўсё, многае. Плямы паадчышчаліся.
паадчышча́ць, ‑аю, ‑аеш, ‑ае; зак., што.
Адчысціць усё, многае. Паадчышчаць гразь. Паадчышчаць адзенне.
паадчэ́плівацца, ‑аецца; зак.
Расчапіўшыся, адчапіцца — пра ўсё, многае. Вагоны паадчэпліваліся.