глытну́ць, ‑ну, ‑неш, ‑не; ‑нём, ‑няце; зак.
Тое, што і глынуць. [Жанчына] глытнула некалькі разоў гарачага чаю. Караткевіч.
глыто́к, ‑тка, м.
1. Аднаразовы рух глытальных мышцаў пры глытанні; глытальны рух. Піў захліпаючыся, глыбокімі глыткамі. Напіўшыся, прылёг на левы бок. Хомчанка.
2. Колькасць яды або вадкасці, якую можна праглынуць за раз. Маленькі глыток. □ [Лялькевіч] выцер рукавом пот і, закінуўшы галаву, пачаў піць павольна, смакуючы кожны глыток. Шамякін. // Зусім невялікая колькасць яды або пітва. У бязмежнай прасторы сіняй не знайсці ні глытка вады. А. Вольскі.
глэ́маць і гла́маць, ‑аю, ‑аеш, ‑ае; незак., каго-што і без дап.
Разм. Хапаць зубамі, губамі. Конь Сомікаў стаяў доўга, глэмаў снег. Крапіва.
глэ́мнуць, ‑ну, ‑неш, ‑не; ‑нем, ‑неце; зак.
Аднакр. да глэмаць, гламаць.
глю́га, ‑і, ДМ глюзе, ж.
Разм. Дзюба ў драпежных птушак. Крумкач глюгу звесіў Над згніўшай калодай. Купала.
глюга́сты, ‑ая, ‑ае.
З вялікай глюгай. Глюгасты арол. // Падобны на глюгу. Глюгасты нос.
глюко́за, ‑ы, ж.
Салодкае рэчыва, вуглявод у пладах раслін; вінаградны цукар.
[Ад грэч. glykys — салодкі.]
гляда́ч, гледача, м.
1. Той, хто глядзіць што‑н., назірае, сочыць за чым‑н. Спрактыкаванае вока старонняга гледача заўважыла, як шпарка рос гэты калгасны пасёлак. Колас.
2. Той, хто глядзіць спектакль, фільм і інш. віды мастацтва на сцэне. Праз хвіліну, не болей, Рыгорава постаць знікла ў натоўпе шумлівых гледачоў, што густою сцяною адрэзалі сцэну ад залы. Гартны. / у знач. зб. Фільм «Канстанцін Заслонаў» заваяваў любоў гледача. «Беларусь».
гляда́чка, ‑і, ДМ ‑чцы; Р мн. ‑чак; ж.
Жан. да глядач.
глядзе́льны, ‑ая, ‑ае.
1. Тое, што і аптычны. Глядзельнае шкло. Глядзельная труба.
2. Прызначаны для гледачоў (у 2 знач.). Глядзельная зала.