перасядло́ўвацца, ‑аецца; незак.
Зал. да перасядлоўваць.
перасядло́ўваць, ‑аю, ‑аеш, ‑ае.
Незак. да перасядлаць.
перасяка́льнасць, ‑і, ж.
Спец. Магчымасць або здольнасць перасякацца. Даказаць перасякальнасць ліній.
перасяка́льны, ‑ая, ‑ае.
Спец. Які можа або здольны перасякацца. Перасякальныя лініі.
перасяка́нне, ‑я, н.
Дзеянне паводле дзеясл. перасякаць — перасячы, перасекчы (у 1 знач.).
перасяка́цца, ‑аецца; незак.
1. Незак. да перасячыся, перасекчыся.
2. Зал. да перасякаць.
перасяка́ць, ‑аю, ‑аеш, ‑ае.
Незак. да перасячы, перасекчы.
перасяле́нец, ‑нца, м.
Той, хто перасяляецца, перасяліўся на новае месца. На нашы позіркі ён усміхнуўся І адказаў: — Я магілёўскі родам. Перасяленец. Сёлета вясною Было паўвека роўна, як адтуль... Гілевіч. / Пра расліны, жывёл, птушак і пад. Вясной дрэўца пусціла першыя зялёныя пятачкі глянцавітага лісця, і ўзрадаваўся Мітрафан: перасяленец прыняўся. Ракітны. За адзінаццаць год усурыйскія яноты размножыліся і разбрыліся далёка ад таго месца ў Парыцкім раёне, дзе былі выпушчаны першыя далёкаўсходнія перасяленцы. В. Вольскі.
перасяле́нка, ‑і, ДМ ‑нцы; Р мн. ‑нак; ж.
Жан. да перасяленец.
перасяле́нне, ‑я, н.
Дзеянне паводле знач. дзеясл. перасяляць — перасяліць і перасяляцца — перасяліцца.