перадушы́ць, ‑душу, ‑душыш, ‑душыць; зак., каго-што.
Падушыць усіх, многіх або ўсё, многае. Віхрам уляцяць хлопцы-малойцы ноччу ў Ліпкі, перадушаць гітлераўцаў і вызваляць нявольніка. Кавалёў. Калі б я не прачнуўся, воўк мог бы перадушыць палову статка... Ляўданскі.
перадыскантава́ць, ‑тую, ‑туеш, ‑туе; зак., што.
Спец. Зрабіць дысконт (у 1 знач.). Перадыскантаваць вэксалі.
перадысканто́ўвацца, ‑аецца; незак.
Зал. да перадыскантоўваць.
перадысканто́ўваць, ‑аю, ‑аеш, ‑ае.
Незак. да перадыскантаваць.
перадыслака́цыя, ‑і, ж.
Перамяшчэнне войск, размяшчэнне іх у другім месцы. Як ні намагаліся немцы, а ўсё ж ім прыйшлося прыняць пункт, якім забаранялася перадыслакацыя войск. Гурскі.
перадыслацы́раваны, ‑ая, ‑ае.
Дзеепрым. зал. пр. ад перадыслацыраваць.
перадыслацы́равацца, ‑руецца; зак.
Перамясціцца куды‑н., размясціцца ў другім месцы (пра войска). Неўзабаве.. Беларускі штаб партызанскага руху аддаў загад брыгадзе імя Ракасоўскага перадыслацыравацца ў Вілейскую вобласць. Дзенісевіч.
перадыслацы́раваць, ‑рую, ‑руеш, ‑руе; зак.
Зрабіць, правесці перадыслакацыю.
перады́х, ‑у, м.
Разм. Тое, што і перадышка. Аднак тут у гаворку ўступаецца Чарнушка. — Дай ты чалавеку перадых. Мележ. Потым Цапка нешта нібы скаланула, ён загаварыў хутка, амаль без перадыху. Сачанка. [Дождж] усё лета хвошча без перадыху. Грахоўскі.
перадыха́ць, ‑аю, ‑аеш, ‑ае.
Незак. да перадыхнуць (у 2 знач.).