гляцыёлаг, ‑а, м.
Спецыяліст у галіне гляцыялогіі.
гляцыялагі́чны, ‑ая, ‑ае.
Які мае адносіны да гляцыялогіі. Гляцыялагічная экспедыцыя.
гляцыяло́гія, ‑і, ж.
Навука аб фізічных уласцівасцях леднікоў, іх паходжанні і ўплыве на развіццё зямной паверхні.
[Ад лац. glacies — лёд і грэч. logos — вучэнне.]
глячо́к, ‑чка, м.
Памянш.-ласк. да гляк; невялікі гляк. Маеш дачку — май і гарэлачку ў глячку. Прыказка.
гм, выкл.
1. Выражае недавер’е, сумненне, іронію. — Гм, — чмыхае крамнік, крытычна мацаючы поглядам .. настаўніка. Мурашка.
2. Ужываецца пры нерашучасці або немагчымасці сказаць, вымавіць што‑н. — Гм... — пачаў здагадвацца аб нечым Тарас. Якімовіч.
гмах, ‑у, м.
Вялікі вышынны будынак. Я ў сталіцы ізноў Сярод гмахаў-дамоў, Што здзіўляюць красой небывалай. Журба. Высокі клён, Але і ён — Па пояс дому-гмаху. Макаль. // перан. Увогуле пра што‑н. вялікае, велічнае. Дуб і сосны — векавыя гмахі, Не баяцца бур і навальніц. Пысін. Грамада — вялікі гмах: Адзін ляжа, сто ідзе, А хто ж роўны грамадзе?! Купала.
[Польск. gmach з ням.]
гмі́на, ‑ы, ж.
Самая дробная адміністрацыйна-тэрытарыяльная адзінка ў Польшчы. Ваявода Даўнаровіч абяцаў распачаць шырокі наступ на бунтарскія гміны і вёскі са сваімі людзьмі, якіх падбіраў асабіста. Паслядовіч. // Адміністрацыйны цэнтр такой адзінкі, дзе знаходзіцца яе кіруючы апарат. У .. доме каля плошчы размясцілася гміна, куды солтысы носяць садраныя з людзей падаткі. Брыль.
[Польск. gmina з ням.]
гмі́нны, ‑ая, ‑ае.
Які мае адносіны да гміны. Гмінны пісар.
гмы́каць, ‑аю, ‑аеш, ‑ае; незак.
Разм. Вымаўляць «гм», выказваючы сумненне, здзіўленне.
гмы́кнуць, ‑ну, ‑неш, ‑не; зак.
Аднакр. да гмыкаць.