ХА́СІЙ (лац. Hassium),

Hs, штучны радыеактыўны хім. элемент VIII групы перыяд. сістэмы, ат.н. 108, адносіцца да трансактыноідаў; пераходны элемент. 8 ізатопаў з масавымі лікамі 263—270; найб. устойлівы ​269Hs (перыяд паўраспаду 9,3 с). Сінтэзаваны і ідэнтыфікаваны ў ФРГ (1984), таксама атрыманы ў 1984 у Аб’яднаным ін-це ядз. даследаванняў у г. Дубна (Расія). Назва ад ням. зямлі Гесен (Hessen); зацверджана Міжнар. саюзам тэарэт. і прыкладной хіміі (1997).

Мае серабрыста-белы ці серабрыста-шэры колер з метал. бляскам. Утварае з кіслародам вельмі лятучы газападобны аксід. Самы цяжкі з элементаў, даследаваных хім. метадамі (2002). Уласцівасці падобны да осмію.

М.​М.​Касцюковіч.

т. 16, с. 559

Беларуская Энцыклапедыя (1996—2004, правапіс да 2008 г., часткова)