ТЫЛЕ́Я (Tillaea),

род кветкавых раслін сям. таўсцянкавых. Каля 10 відаў. Пашыраны ў Паўн. паўшар’і. На Беларусі 1 від — Т. вадзяная (T. aquatica). Расце на вільготных пясчаных берагах рэк, азёр, на водмелях.

Т. вадзяная — аднагадовая травяністая расліна выш. 2—5 см. Сцёблы разгалінаваныя, у вадзе прамастойныя, на глебе — распасцёртыя, у вузлах укаранелыя. Лісце супраціўнае, сядзячае, лінейна-завостранае. Кветкі белыя, размешчаныя па адной у пазухах лісця. Плод — чатырохлістоўка.

т. 16, с. 73

Беларуская Энцыклапедыя (1996—2004, правапіс да 2008 г., часткова)