ТАНТАЛІ́Т (тантал + грэч. lithos камень),
мінерал падкласа складаных аксідаў, (Fe, Mn) (Ta, Nb)2O6, крайні член бесперапыннага ізаморфнага рада калумбіт — Т. Мае аксід танталу (Ta2O5) да 86%, прымесі ніобію, волава, вальфраму, урану, тытану і інш. Крышталізуецца ў рамбічнай сінганіі. Крышталі пласціністыя, прызматычныя, ігольчатыя. Колер чорны, чырванавата-карычневы да ружовага. Цв. 6,5—7. Шчыльн. 6,2—8,2 г/см³. Крохкі. Радыеактыўны. Паходжанне эндагеннае высокатэмпературнае (у гранітных пегматытах, грэйзенах), трапляецца ў россыпах. Руда танталу і ніобію. Радовішчы ў Канадзе, Бразіліі, Аўстраліі, Мазамбіку, Дэмакр. Рэспубліцы Конга, Расіі, Казахстане і інш.
т. 15, с. 426
Беларуская Энцыклапедыя (1996—2004, правапіс да 2008 г., часткова)