ТАІ́РАЎ (сапр. Корнбліт) Аляксандр Якаўлевіч

(6.7.1885, г. Рамны Сумскай вобл., Украіна — 25.9.1950),

расійскі рэжысёр. Нар. арт. Расіі (1935). Творчую дзейнасць пачаў у 1905 як акцёр, з 1908 — рэжысёр. Заснавальнік (сумесна з А.​Коанен) і маст. кіраўнік Камернага т-ра (1914—49) у Маскве. Адзін з рэфарматараў рус. сцэны. Імкнуўся да стварэння «сінтэтычнага т-ра» — пераважна рамант. і трагедыйнага рэпертуару, выхавання ў акцёраў віртуознага майстэрства, пераўтварэння сцэн. прасторы. Сярод пастановак: «Фаміра-кіфарэд» І.​Аненскага (1916), «Саламея» О.​Уайльда (1917), «Прынцэса Брамбіла» паводле Э.Т.​А.​Гофмана (1920), «Федра» Ж.​Расіна (1922), «Каханне пад вязамі» Ю.​О’Ніла (1926), «Аптымістычная трагедыя» У.​Вішнеўскага (1933), «Мадам Бавары» паводле Г.​Флабера (1940) і інш.

т. 15, с. 383

Беларуская Энцыклапедыя (1996—2004, правапіс да 2008 г., часткова)